Malagasy niasa tany Maurice: Miasa iray volana vao manasonia “contrat

Resahana hatrany, tato ho ato ny mahakasika ireny tera-tany malagasy mila ravinahitra any andafy ireny. Saika nifantoka tamin’ny resaka Liban ny resaka satria tany no nahitana tranga mahatsiravina sy nahonena, nihatra tamin’ireo vehivavy tera-tany Malagasy. Nanao izay ho afany ny fanjakana mba nanafoanana ireny fiondranana ireny aloha, saingy ankehitriny dia mbola mahazo vahana izany. Misy ny sarona eny am-panidinana, fa ny mahagaga dia misy ny tafita any ivelany any ihany. Efa maty, na tratry ny fahavoazana any vao fantatra fa hay nandeha koa ikala anona iny! Ny fandehanana miasa any, tsy olana fa ny zava-misy dia fanandevozana no hita. Tsy hitantara ny any Liban intsony aho fa ao amin’ny nosy Maurice koa ange ka misy karazan’asa handrantovana Malagasy hiasa any e! amin’ny internet no hiantsoany izay te hiasa. Misy ity orinasa iray misahana serasera ity izao dia niantso Malagasy manao “opérateur chat” any Maurice. Dia tena hoe tombontsoa raisim-potsiny raha ny ao amin’ny internet satria voalaza tao fa manodidina ny 375 000 ariary ny karama, ary misondrotra mihoatra ny 50%, afaka roa na telo volana.