Dian’ny filohan’ny FA T: Nitady tombony ka natombiny

Taorian’ny dinika tamin’ny filohan’i Mozambika, araka ny tatitra, dia namaly ny fanontanian’ireo mpanao gazety mozambikana sy vahinytonga teny amin’ny lapam-panjakana ny filohan’ny FAT, ka tamin’izany no nanambarany fa nahafa-po azy ny dinika nifanaovany tamin’ Atoa Armondo Emilio GUEBUZA.« Nihaino ny fanazavany ny fivoaran’ny toe-draharaha politika eto Madagasikara ny filoha mozambikana, ka notsindriany tamin’izany fa araka ny voatondron’ny fepetra tetezamita ao amin’nylalampanorenan’ny Repoblika fahaefatra vao lany farany teo, dia izy (Andry Rajoelina) no filohan’ny tetezamita mandrapahavitan’ny lanonana famindram-pahefana amin’izay filohan’ny Repoblika fahaefatra ho lany eo ». Nambarany tamin’ny filohan’i Mozambika

koa anefa fa « na dia eo aza izany fepetra voatondron’ny lalampanorenana izany, dia nanaiky ny hampihatra ny sori-dàlana novolavolain’ny mpanelanelana avy amin’ny SADC miaraka amin’ireo mpisehatra politika rehetra izy ».

« Efa misokatra amin’ireo fironana politika samihafa ny governemanta najoro mba hisian’ny tetezamita iraisana sy tsy manavaka, araka ny voarakitra ao amin’ilay sori-dalana ». « Ary mba tsy isian’ny ahiahy dia nilazako ny filoha mozambikana fa hotohizana ny fampiharana ireo fepetra rehetra voatondron’iny sori-dalana iny mba ahazoana manatanteraka fifidianana malalaka, marina,

mangarahara ary demokratika». Niangavy ny filoha mozambikana koa ny tenany hanampy azy amin’ny fanatanterahana iny sori-dalan’i Simao iny mba hivoahan’i Madagasikara amin’ny krizy politika, ary dia nanaiky izany

moa ny filoha Armondo Emilio GUEBUZA, araka ny voalazan’ilay fanambarana ». Fa ny momba ny fahazoan’ny filoha teo aloha Ravalomanana Marc milatsaka

hofidina ho filohan’ny Repoblika kosa, dia nazava sady hentitra ny valin-teny nomeny ny mpanao gazety :« na aiza na aiza eran-tany, ny olona efa nohelohin’ny fitsarana tsy mahazo ary tsy afaka milatsaka hofidina ».« Noraisiny ho ohatra ny hoe ahoana no azo isaintsainana fa i Ben Ali sy Hosni Moubarak dia mbola ho afaka ilatsaka hofidina ho filoham-pirenena any amin’ny fireneny avy ? », araka ny nambarany. Raha ny vaovao re moa dia toa hoe mbola handalo tany Afrika atsimo sy Zambia izy tamin’ity diany ity, fa nahagaga ny maro izao fiverenany tampoka an-tanindrazana izao. Tsy mba nisy mantsy fanambarana ofisialy navoakan’ireo filoha notsidihiny ireo hatramin’izao, fa feondakolosy tokana avy amin’ny FAT no mivoaka, ka mampiahiahy… Dia mbola tsy nahita rirany indray ve ?