Aiza ilay entana mora nampanantenaina ny vahoaka ?

Sahirana ny vahoaka, saingy tsy afa-manoatra ! Izao no tokony hanaovan’ny mpitondra ankehitriny ireo fampanantenana nataony teny an-kianja, raha vao nandrombaka ny fahefana izy ireo, ny taona 2009. Io no nambaran’ny filohan’ny Pladicc, na ny fikambanana miaro ny zon’ny mpanjifa. Ny menaka mora sy ny vary izay nanaovana angoan-tenda, dia tokony ho tanterahin’ny FAT, satria tsy ny vahoaka no nitaky izany, fa dokam-barotra nataon’ny mpitondra ankehitriny, izay nambabo ny fon’ny maro, ka nampirodana ny mpitondra teo aloha. Tsy afaka hiaro ny mpanjifa intsony aloha hatreto ity Pladicc ity, satria ny fiainana mihitsy no efa manempotra ny mpivarotra sy ny mpanjifa, ka sao hifototra aty aminay indray ny hatezeram-bahoaka hoy ny Pladicc. Momba ny fampihenana ny karaman’ny mpikambana ao amin’ny Governemanta 25% dia tsara hoy i Tolotra ny fahatsapan-tena toy izany, saingy raha mitaha amin’ny karama be raisin’izy ireo izany, moa misy dikany inona ? Ny fanabeazana ny vahoaka no tanjon’ity fikambanana ity ato ho ato, ary hisy hetsika izay kasain’izy ireo ho atao.

Raleva zokiny