Tetezamitan’ny ankolafy telo: Famonoan-tena ara-politika ?

Tapi-dalan-kaleha ? Nampiadiana ny hevitra, nandritra ny fotoana maharitra, fa ny rora hatrany no lany. Tsy nahitana mangirana mihitsy ny olana ara-politika eto amin’ny tany sy ny firenena. Misy ny kely finoana sy ny miraviravy tanana amin’izay mety haterak’izao fikatsoana izao, ka leo sy tsy mivaky loha intsony ny amin’izay tena tiany ataony. Tsy midika ho hadalana ve ny mikiry amin’ny mety ho fahafatesana ara-politika ? Tsy manantena intsony ny mety hahafehezana ny filaminana ka aleo hikorontana tanteraka ? Raha hanangana ny tetezamita hafa ve ireto mpanao politika mivondrona ao amin’ny ankolafy telo ireto dia manao izay hitsin’ny lohany fotsiny ho fanoherany ny fikasan’ny mpitondra avo hanao ny fifidianana amin’ny volana septambra ? Tsy ny famahana krizy no andrasana amin’izy rehetra ireo, na inona hevitra tohanana na inona ? Nambaran’ny mpihazona ny fahefana hatramin’izao fa miezaka namaha io krizin’ny Gasy io ny mpitondra, hatrizay, ka anisan’ny lehibe indrindra tamin’ireny ny filazany fa rehefa lany s y vo a f i d i m - b a h o a k a ny Lalàmpanorenan’ny Repoblika IV dia mivaha ny krizy. Ambonin’io dia mbola tohizany ihany ny fitantanana ny tetezamita satria voasoritra ao anatin’io Lalàmpanorenana io izany. Ary farany dia aleo ho mpanohitra ny fitondrana izay tsy mankatoa izany rehetra izany. Dia aiza ho aiza amin’ireo no hirika sy mangirana fa hilamina ara-politika isika ? Koa tsy nahagaga raha naneho ny fahavononana haneho ny heriny amin’ny fananganana sy fikarohana ny « mba » vaha-olany koa ilay noterena ho mpanohitra satria izy tsy te-hanohitra. Dia iza amin’ireo no tapi-dalan-kaleha ?

Fanerena ho amin’ny fiverenana amin’ny dinika Tsy hisy mpanao politika hampiseho « hadalana » ka hanao sotro ranon’alika tsy akory. Raha mbola misy resaka azo hatolotra dia eo hatrany izy ireo. Ny tetezamita hafa tian’ny ankolafy telo hajoro dia hampisehoana amin’ny rehetra fa manana ny stratejia ho famahana ny olana koa ry zareo ( ?) fa tsy natao ho manaraka ny fironan’ny fitondrana avo fotsiny, na koa hoterena hanohitra tsy hisy mpihaino. Amin’ny fomba ahoana moa no hilazàn’izy ireo indray, taorian’iny dinika farany teny Ivato iny, fa mety aminy, na koa tsipahiny ny fanatanterahana ny fifidianana ? Moa tsy efa notsipahiny ny fitsapan-kevi-bahoaka ? Fa tsy nahitam-bokany izany. Tsy maintsy mbola hitohy lavareny ny fifandrohitana ary tsy hisy hanaiky ho resy tsy miady mihitsy ny mpanao politika Gasy eo anatrehan’ny krizy ankehitriny. Raha mihalava ny krizy dia hahay politika daholo ny « bado sy dondrona » rehetra ka samy haka ny anjara birikiny amin’ny fikarohana ny fampitomboana olana. Ka efa miha-bado ve ny mpanao politika ka aleony « maty » toy izay resy dohika ? Mbola mety ho anisan’ny ady (hevitra) ve ny fikasana hamboly korontana eto ? Tsy tokony hifanentanan’ny mpanao politika ny fampitsaharana ny fifankahalana ? Ka hitondra inona ny tetezamita roa samy hafa ? Samy manana ny laharam-pahamehana hatrehany ? Mbola lavitra tokoa ny fitoniana ! Ony Rambelo