Repoblika fahefatr’i Madagasikara: Teraka ihany fa « zaza sary »

Mitombo ny olana Tsy mahazo mody aty Madagasikara koa ny Deba ary efa nivoaka ny « naoty » mikasika izany. Iza no sahy hilaza fa mariky ny fitoniana ara-politika ny fandraràna toy izany ? Ratsiraka Didier dia tsy nanome alalana na iza na iza hisolo tena na hiresaka ny mikasika azy amin’izao fikatsaham-baha-olana eto Madagasikara izao. Nandeha mantsy ny feo teo aloha fa ny tena antony nampisisika andRavalomanana hody teto Madagasikara dia hamaha ny olan’ny Gasy sy hamarana izany. Koa nanamarika ity filohaben’ny Arema ity, fa tsy mahasolo tena azy velively raha ny filoha taloha Ravalomanana, fa tsy maintsy ny tenany ihany no hametraka ny dian-tanany amin’izao raharaha izao. Tsy ireo ihany fa mbola misy ihany koa ny mpanao politika tsy mankasitraka velively ny vaha-olan’ny sehatra iraisam-pirenena, izay heverin-dry zareo ho fitsabahana be loatra amin’ny raharaha samy Malagasy. Anisan’ireny ny tariky ny praiminisitry ny fahefana Avo taloha, sy ny antoko Otrikafo ary ny mpomba azy ireo. Ambonin’ireo rehetra ireo dia mila « mpanohitra » ny fitondrana izay tarihiny ny filohan’ny tetezamita avo, raha ny firesany tany amin’ny fitsidiham-paritra izay nataony farany teo. Koa ireo mpandà sy tsy manaiky hanao sonia àry ve no tiany hanohitra ny fitondrany ? Dia fitondrana toy inona ity ho toherina ? Ilay tetezamita avo ? Sa ilay Repoblika IV ? Tsy mihevitra ny ho mpitondra ny Repoblika izay natsangany velively ny mpihazona ny fahefana satria tao amin’ireo ady varotra politika rehetra izay nataon’ireo mpanohana azy (eny fa na ny tenany aza) dia tsy niaro velively ity Repoblika faha-IV ity.

« Zaza sary » Na manao ahoana na manao ahoana mety ho tohin’ny ady hevitra politika mbola hisy (ary tsy maintsy hisy) dia teratera-poana sy tsy nanana « Ray » ho mpiaro azy ny Repoblika faha-IV. Nigadragadra foana ireo nikely aina ho nanohitra ny lalàmpanorenana nanorenana azy, lany rora fotsiny ireo andiana mpanao politika sy « vahoaka » nanao ny « tsia ». Ary ny tena tra-nenina sy natao ho tsinontsinona dia ireo « vahoaka » nanantena (sy nampanantenaina) fa vaha-olan’ny krizy ny fitsapan-kevi-bahoaka izay natao tamin’ny taon-dasa. Tsy misy na iray aza ankehitriny mpanao politka Gasy mba niaro sy nampanjaka ny hevitr’ireo vahoaka nampanantenaina ny « fitiavana » sy ny fiovana ireo. Moa an’isan’izany maha-zaza sary ny Repoblika IV izany ny mbola tsy hananany « fitombo-kase » tena azy hatramin’izao ? Mbola ilay an’ny Repoblika III ihany no notinginina « fitiavana » e ! Mba saino ihany fa tsy misy miaro ny hevitry ny « vahoakany » izany ho’aho ny mpanao politika Gasy.