Fanaovana « charcuterie »: Krizy ny hena omby

Ny mpanao “charcuterie” kosa no tena ianjadian’ny krizy satria mitaky hena manara-penitra ny vokatra avoakany. Mahagaga fa ny hena kisoa no noheverina ho lany tamingan’ny pesta, saingy ankehitriny dia ny omby indray no saro-tadiavina noho ny zana-kisoa (fanaovana cochon de lait). Ireo mpivarokena kosa dia nanamarika fa nisy fihenàny be dia be tokoa ny entana amidin’izy ireo. Raha nahalafo omby iray ny mpivarotra iray, talohaloha teo, dia zara raha mahalafo ampahefatr’omby amin’izao ankatoky ny fety izao. Toa tsy dia mandeha ihany anefa ny hena omby, hoy ity mpivarotra, raha tsy ireny mpanao hotely sy mpandraharaha ireny no manjifa azy. Rehefa dinihina tokoa dia saika saosisy avokoa no mandravaka ny fivarotan-kena maro eto an-drenivohitra. Tsy hita firy intsony ireny rambon’omby, silamangany, tongotr’omby, sns…na misy aza dia nampakatra ny vidin’ny lasopy. Ny asan-dahalo no fositra, hoy ireo mpanafatra omby eto an-drenivohitra. Zara raha manana omby hamidy ny faritra maro mpanondrana izany toa ny any Melaky, Bongolava sy manerana ny faritra Sofia, Matsiatra ambony, Ihorombe, hatrany Atsimo andrefana rehetra iny. Manao izay ho afany ny mpitandro filaminana fa tsy maharaka ny an’ireo dahalo akory ny fitaovana enti-miady. Amin’izao ankatoky ny fety izao no fandehanan’ny tsenan’ny mpanao “charcuterie”. Efa nisondrotra ny vidin’entana amin’ny ankapobeny. Ny tena ilàna ny hena omby amin’ity asa ity moa dia maro toy ny “tsa-tsiou”, ny saosisy, ny kitoza, sns… HERY A