Raharaha fantsika iray kaontenera: Ny voasoloky indray no enjehina

Tamin’ny zoma 12 novambra teo dia tsy nisy resaka tao amin’ny efitrano fitsarana satria tsy nipoitra ny notoriana, ary ny an’ity mpitory moa dia ny mpisolo vava azy no tonga teo. Ankehitriny anefa dia i RM, mpitory indray no voalaza fa karohan’ny polisy ekonomika ao Toamasina sy ny borigady manokana eto Antananarivo amin’izao fotoana izao noho io raharaha io ihany. Rehefa nojerena tany an-tranony ny olona karohana dia voalaza fa any Tolagnaro sy any Miarinarivo. Miriaria eny izany ireo voarohirohy ho nisoloky saingy tsy mipoitra eny anivon’ny fitsarana, kanefa tsy namoahana didy fampisamborana. Eo no manahirana ny mpisolo vava ilay tompon’entana voasoloky satria mila tsy ho hita an-javony ity raharaha ity. Ahiana ny fisian’ny ambadika hafahafa amin’izao raharaha izao raha ny fandehan’ny tantara no zohiana. Asa aloha raha mi s y hifandraisany, fa misy orinasa maromaro no velon-taraina amin’ny afitsok’izany vehivavy mpanao taratasim-bola tsy misy antoka izany. Hita tamin’ny fahitalavitra tsy miankina iray izany ny faran’ny herinandro teo. Olona 5 no efa voasolokiny, ary miriaria eny izy na dia notoriana aza. Didy fampisamborana ihany koa no andrasan’ireo olona lasibatra amin’io raharaha io. Izany angamba no hoe “tsy maty manota” ara-bakiteny ? Sa misy ny ambinin’ny lalàna? BEDIM