Miss Earth 2010: Miatrika izany i Alexandre Randrianarivelo

Efa tonga soa any Vietnam hatry ny ela i Alexandre Randrianarivelo, ilay nibata ny laharana voalohany tamin’ny RTA Miss&Mister voalohany tamin’ity taona ity mba hiatrika ilay fifaninanana iraisam-pirenena antsoina hoe : “Miss Earth 2010”, izay karakarain’ny televiziona Sony Style ary alefa amina fahitalavitra VTV, Star World sy ireo fahitalavitra iraisam-pirenena maro. Haharitra iray volana moa ity fifaninanana hatsaran- tarehy ity ka tsy hifarana izany raha tsy ny 4 desambra ho avy izao ary any amina tanana maro any Vietnam toy ny Hô Chi Minh-Ville, Phan Thiêt, Hôi An, Hanoi ary Nha Trang. Mpifaninana miisa 88 no miatrika izany izay ahitana ireo mpanjakan’ny hatsaran- tarehin’ireo firenena maro maneran-tany. “Ny rano”, io no lohahevitra noraisina tamin’ity andiany fahafolo ity, izay entina hanantenana ny olona amin’ny fiarovana ny tontolo iainana, indrindra fa ny rano. Ankoatra ny filatroana ao anatin’ny fitafiana nentin-drazana sy fanao an-tanan-dehibe ary ireo fanamiana fitondra milomano izay efa mahazatra dia hitsarana azy ireo ihany koa mazava ho azy ny hetsika mahaolona, ara-tsosialy ary fahaizana. Marihina fa ilay brezilianina, Larissa Ramos no lany ho “miss earth 2009”. Ao amin’ny complexe Vinpearl any Nha Trang ny 4 desambra amin’ny 8 ora alina no hanatanterahana ny lalao famaranana izay entanin’ilay mpanentana malaza ao amin’ny Sony Style, Oliver Petttigrew izay hoafanain’ilay mpihira malaza Rona Keating.