Nidonan-tsetroka indray Antananarivo

Dia raikitra ny sakoroka. Henjakenjana ihany ny fifanandrinana na dia tsy naharitra aza satria dia ravan’ny mpitandro filaminana ihany. Nidonan-tsetroka teny amin’ny manodidina an’Antanimena sy Behoririka teny. Tsikaritra fa niha maro ireo mpanao fihetsiketsehana ka tsy antonona tao amin’ny Magro Behoririka toerana niatombohan’ny fifanjevoana. Velona ny kiririoka ka teo no nahataitra ny mpitandro filaminana. Tamin’ny 4 ora tolakandro teo dia fantatra fa mpanao fihetsiketsehana roa no voasambotry ny mpitandro filaminana. Manomboka mandry tsy lavo loha indray ny mponina ao ampovoan-tanàna ao. Efa nanakaton-trano aovkoa ireo mpivarotra teny amin’ny manodidina ary tsy sahy nisokatra omaly tontolo andro. Tsy hihemotra ireto mpanao fihetsiketsehana araka ny nambarany fa hanohy ny tolona efa natombony. Maresaka teny an-kianja moa ny hiakaran’ny hafanana eo amin’ny resaka politika satria amin’ny faran’ny herinandro izao dia tsy maintsy hanatanteraka hetsika fanoherana ny fitsapan-kevi-bahoaka eto Antananarivo i Monja Roindefo. Tsy mifanalavitra amin’io ny hevitr’ireto ankolafy Madagasikara ireto, ka asa izay hiseho na hahay hiaraka amin’ny ankolafy nanohitra ny fanonganam-panjakana nataon’i Roindefo ireto ankolafy telo ireto na hanindry fo ka ny fanafoanana referandaoma no jerena ary mba miarakaraka amin’i Monja eo aloha. HERY