Ambohijatovo: Tafiditra kianja ny mpanohitra

Nitomandavana ny filaharana niakatra teny amin’ny kianjan’ny demokrasia Ambohijatovo, ary fotoana fohy taorian’io, dia tonga teny ingahy Fetison Rakoto Andrianiriana, sy ny profesora Zafy Albert. Narahin’ny vahoaka maro hatrany izy ireo, ary nisy ny kabary politika, izay tsy hanekena ny tsy rariny ataon’ny mpitondra tetezamita ankehitriny. Ilaina ny fampihavanam-pirenena, ary atao izay hiverenan’ireo ray aman-dreny nitsoa-ponenana any ivelany. Nisaotra ny mpitandro filaminana ihany koa izy ireo namela malalaka amin’ny fanehoan-kevitra nataony teny Ambohijatovo. Voalaza fa tsy hiato intsony izao hetsika izao, ary io kianja io no hanehoana izany hevitra izany manomboka izao. Nanomboka niakatra tsikelikely teny Ambohijatovo ihany koa ireo mpitandro filaminana, ary nilamina tsara ny fanehoan-kevitra teo amin’ity toerana manana ny tantarany ity. Nanomboka tonga tsikelikely ihany koa ireo mpanao politika mpitari-tolona etsy amin’ny Magro, ary vetivety, dia tomefy olona io kianjan’ny demokrasia lasa faritra mena io. Raha ny hita teny andalana rehetra teny omaly, dia narovan’ny mpitandro filaminana ireto mpanohitra ireto, hatreny Ambohijatovo. Nisy ihany koa tetsy ankilany ny fikasana hidina teny amin’ny kianjan’ny 13 mey io omaly maraina io, ary ny atoandro, dia nipoaka ny lakrimozena. Niparitaka noho izany ireto vahoaka maro be ireto, ary heno fa anio, dia mbola hiverna etsy Ambohijatovo izy ireo. Imasomahita