Filan’ny mponina amin’ny rano: Ny ampahefatry ny Malagasy no mahazo tombony

Nahitana fihenana ihany koa izay fahazoana rano teto amintsika izay, araka ny antontan’isa ihany. Tamin’ny taona 2008 ohatra dia fantatra fa ny 47%-n’ny tokantrano malagasy no nahazo rano tao an-tokantranony. Roa taona aty aoriana, izany hoe, amin’izao taona 2010 izao dia nihena hatramin’ny 6% ny isan’izy ireo. Raha ny voafaritra ao anatin’ny tanjon’ny taonarivo fahatelo anefa dia tokony ho Malagasy sivy tapitrisa manerana ny Nosy no hahazo rano fisotro madio hatramin’ny taona 2015. Nanomboka ny taona 2002 mandraka ankehitriny aloha dia mbola loharano fisotro madio miisa 1 200 no napetraka teto amintsika. Ny 88%-n’ny fahafatesana vokatry ny aretim-pivalanana anefa dia noho ny tsy fahampian’ny fotodrafitrasa famatsiana rano fisotro madio avokoa. Ny aretim-pivalanana izay mbola mitoetra ho anisan’ireo aretina mamono ny ankizy latsaky ny dimy taona eto Madagasikara. Ny 17%-n’ny zaza Malagasy no mamoy ny ainy mialoha ny faha-dimy taonany eto amintsika. Miisa 71 000 ireo ankizy latsaky ny dimy taona tra-pahafatesana isan-taona ary 195 isan’andro. Miampy ny olana ateraky ny fiovaovan’ny toetrandro ireo rehetra ireo dia tsy fantatra izay ho avin’ity firenentsika ity. Milaza ny heviny ihany koa ireto olona sendra anay ireto. Harimbola M.