Finoana: Mipongatra ireo mpitory teny

Fa ny tena manaitra ny saina sy mahavalalanina ny maso dia ny hamaroan’ireo pasitera na olon’Andriamanitra, izay tsy hay fihaviana sy tsy fantatra mazava na voatendrin’Andriamanitra marina fa samy milaza ho mahafaka sy mahasitrana ary mamaha olana. Fotoanany tokoa izao. Zovy no tsy mila ny famonjen’ilay Nahary amin’izao krizy lavareny izay tsy hisy fahataperany izao? Tsy misy afa-tsy ny fitolomana am-bavaka ihany no hany sisa vahaolana, fa izay vitan’olombelona toa zary ho nofinofy sisa. Fara-fahakeliny, miisa telo eo ho eo ireo fandaharampotoana ankalamanjana hitoriana teny sy hanasitranana olona. Rehefa tonga ny andro ifamotoanana dia indreny mitanjozotra manao tohivakana lavareny ireo mpino sy ireo olona voasarika hanaraka izany. Tsy misy maharatsy izany, satria ny Tompo, i Jesoa Kristy, dia ni-tsodrano hoe : mitoria ny filazantsara amin’ny olona rehetra. Hatrany Samaria, Jodia ary hatramin’ny faran’ny tany”. Fa ny indro kely aminy fotsiny dia ny fifanaratsiana. Samy miseho ho dadany avokoa ka mahavita ny rehetra amin’ny alalan’i Kristy, ary manaratsy ny sasany. Soa fa efa nanafatra mialoha ny Tompo hoe : “tandremo sao ho voafitaka hianareo, fa maro no ho avy amin’ny anarako”. Mivavaha, kanefa mitandrema koa sao dia ho voafitaka marina hianareo, ka holavin’ny Tompo amin’ny andro farany.