Ry goaika antitra mianakavy: Mankaleo fa mihevera tena

Iza no tsy mahalala, fa ny tombontsoa manokanareo mpanao politika ireo anie no hikofokofohanareo miseho amin’ny haino aman-jery saika isan’andro vaky izao e. Raha tsy manao izany mantsy, dia mety tsy hahazo anjara-mofo mamy, rehefa tonga ilay fotoana sarobidy izay. Ianareo ireo ve tsy mahatsapa, fa manodina radio, na manapika tele ny olona raha vao mahita ny endrikareo ? Mihevera tena ry goaika antitra isany, fa sao voavingavingan’ny olona vao gaga. Ny any ivelany, dia mipetraka tsara amin’izay efa azony ny mpanao politika, rehefa niala teo amin’ny fitondrana. Ny mifanohitra amin’izany kosa no hita eto. Olona nitondra tamin’ny andrim-panjakana samihafa izy ireny, efa hatrany amin’ny taona 1960, nefa mbola ireo milaza azy ho be hevitra ihany. Ny tanora natosika hanongam- panjakana, ka nahazo fahefana, dia toroana vohona indray, fa tsy avela hanao araka ny fandaharan’asany. Misy ireo mpanao politika efa zokiny ary nanana anjara toerana lehibe teto amin’ny firenena no mahay manaja tena amin’izao, ary rehefa miteny, dia tsapan’ny vahoaka iray manontolo, fa manan-danja ny hevitra avoakany, ary olona mendrika tokoa. Mba aiza ho aiza amin’ireny ny mpanao politika fotsy volo sasany eto amintsika ? Imasomahita