ESCOPOL: Mafotaka dia mafotaka ny ady seza

Raha ny vaovao fantatra avy amin’ny mpikambana iray ao aminn’ny ESCOPOL dia ireto no mety ho fizarana seza izay efa fantampatatra hatramin’izao, ny an’ny Andrimpanjakana mpanao lalàna dia efa mahatratra 381, izany hoe miisa 256 ny ho mpikambana ao amin’ny Kongresy ary 125 ny ao amin’ny Filankevitra Ambonin’ny tetezamita. Santionany fotsiny ireo ary tsy mbola fantatra indray izay ho fiovany atsy ho atsy . Raha ny mahakasika ilay fanapahankevitra izay noraisin’ireo mpanao pôlitika mba hamahana krizy kosa dia voalaza ao fa Ing Raharinaivo Andrianantoandro (TIM) ary Rtoa Brigitte Rabemanantsoa Rasamoelina (AMP) no atolotr’izy ireo ho filohan’ny Kongresy. Miisa 12 kosa ireo Anarana izay hisafidianana izay ho filohan’ny Filankevitra Ambonin’ny Tetezamita ka ireto avy izy ireo : Mara Niarisy (USDM) ; Seramila Beza Marcel (Tambatra) ; Ramanantsoa Benjamin Marcel (MTS) ; Henri Lecacheur (PFM) ; Zakahely Boniface ; Andry Rasolofo (Fihavanantsika) ; Rakotonirina Jean Claude (Leader Fanilo) ; Benon Guy (FPFM), Rasamoelina Lala Harinaivo (DHD Madagascar) ; Avimana (MISA). Raha ny toerana ho an’ny Praiminisitra vaovao kosa dia nanolotra anarana telo (3) ny tao amin’ny UDR-Fanovana ny Talata lasa teo ka mbola tafiditra tao ihany aloha ny anaran’ny Praiminisitra amin’izao fotoana ny Jly Camiile Vital, Alain Tehindrazanarivelo, izay Praiminisitra teo aloha nisahana ny fahasalamana, ary olom-baovao tanteraka kosa ny iray izay tsy iza fa I Jean Omer Beriziky izy ity indray dia efa mpampianatra tantara tao amin’ny oniversiten’I Toliara, ary efa filohan’ny filan-kevitry ny Ambasadaoron’ireo firenena mitambatra ao amin’ny ACP. Samy afaka mitsara amin’izay manombok’izao ny vahoaka, hoe inona no tena tanjon’ireo ao amin’ny ESCOPOL ireo raha toa ka izany no zava misy. Miharihary toy ny vay an-kandrina mantsy amin’izao ny tian’izy ireo hahatongavana, nefa dia lazaina isan’andro lava izao fa hitady vahaolana hivoahana amin’ny krizy no tanjon’izy ireo. Fitadiavana ny tombotsoa manokana no ataony eo, ary vao maika hanalava hatrany ity fitondrana tetezamita ity, dia ny vahoaka no mizaka izany fitiavan-tenan’ny mpanao politka izany.