Mahalala olona ambony

Mahalala na mahafantatra olona ambony. Efa hatramin’ny andron’ny fanjanahantany no nisian’izany fomba fiteny izany. Nahafantatra ireo governora, indrindra fa ireo lehibena mpanjanaka fahiny. Zava-droa loha hatreo ka hatramin’izao no tena misongadina ao ambadik’izany. Ny voalohany dia ny fanaovana ho biby fampitahorana ireo olona ambony fantatra ary ny faharoa kosa dia ny fanaovana azy ireo ho mpanelanelana amina raharaha iray, izany hoe aferafera e! Mazava ho azy fa resaka kolikoly no tena mibahana ao anatin’ireo. Fahalalana olona ambony, tamin’ny fotoan’andron’ny fanjanahantany no nahasamborana an’ireo Malagasy tia tanindazana niady sy nikaroka ilay tena fahafahana ho an’ny Madagasikara voazanaka......

Nolovain’ireo taranaka taty aoriana izany ary nifandimbiasana tao anatin’izay repoblika telo nifandimby izay. Zovy no tsy nahalala ireo tantara maro nampivandravandra izany fahalalana olona izany fony ireo fitondrana nifandimby ireo. Nanjaka ny kibebe nataon’ireo zanaka na havana mpitondra ambony fony fitondrana Ratsiraka. Izay rehetra nirian’izy ireny toa azony mora foana. Teraka ihany koa teto ny antsoina hoe : « Itsimatimanota », dia ireo tsy mety voasazy mihitsy na dia mandika lalana aza. Ny tena nampalahelo teto dia mivadika ny rasa ka ireo sarangan’olona tsy mahalala olona indray no zary tafiditra eny am-ponja, tsindraindray. Nodimbiasan’ny fitondrana repoblika fahatelo izany. Toy ny teo aloha ihany, na dia tsy nanao izany mivantana aza ireo filohana andrimpanjakana dia nisy tamin’ireo mpitondra sy mpaka ranondranony no nanabe sandry tetsy sy teroa. Tafapaka hatraty amin’ny fitondrana faramparany tamin’ny repoblika fahatelo izany. Be dia be ireo feo nandeha sy mbola mandeha mandrak’ankehitriny mikasika ny « razzia » nataon’ireo mpitondra tamin’izany. Tao ny nisy porofo, tao koa anefa ireo resaka nandeha. « Ny hitsikitsika anefa tsy mandihy foana fa ao raha » ary « ny teny, hono, raha fohy manana elatra ». Izany rehetra izany no tena anton’ny fitolomana teny an-kianja nandritra iny taona 2009 iny. Indrisy anefa fa toa zary « mpitari-bato vilam-bava, ka hafa ny tondroin’ny tanany ary hafa ny handehanany ». Nibobobobo tsy nisy toy izany ny fanaovana ramatahora na teto an-drenivohitra na tany amin’ny faritra ka hatrany ambanivohitra lavitr’andriana any. Ny tena loza dia efa lasa lavitra izany ankehitriny raha ampitahaina tamin’ireo teo aloha. Ankehitriny mantsy dia niova ho raha tsy mahalala olona tsy tafavoaka velona mihitsy, n’inon’inona kasaina hatao. Tsy saro-tadiavina ny porofo fa manadihady kely na manongilan-tsofina etsy sy eroa ihany dia mahafantatra izany raha tsy mbola niharany.