Mahamenatra e !

Asa indray izay zava-miseho any Kampala Ouganda any! Raikitra indray mantsy ny fivoriana fanao isan-taona fanaon’ny Firaisam-be Afrikana. Ny mety hampiavaka azy ity dia ny mety ho fahafaham-barakan’ity tanindrazantsika ity any. Niainga namonjy an’i Kampala ny “solon-tenam-panjakana” malagasy miasa sy monina ao Etiopia ao, ary izy no hisolo tena ny fahefana avo mitondra an’I Madagasikara ankehitriny. Ramose koa dia voaasa hanatrika io fivoriana io, efa nandao an’i Afrika Atsimo izy ankehitriny. Ny anjaran’ny mpiandry tanàna eto an-toerana dia ny maka an-tsaina izay mety ho zavamiseho any. Tsy voalohany anie no nisy fifandrohitana politika nitarika henatra teo amin’ny sehatra iraisam-pirenena e. Fa isika tsy mety fay! Vaha-olana samy malagasy ihany, hono, no tena azo antoka sy mety hivoahana amin’ny kizo manjo antsika... Kanefa dia andiana-malagasy roa samy hafa firehana no hifanasa vangy any an-tanin’olona any. Menatra aho ry fireneko! Amin’ny fomba ahoana no haneken’izao fivoriam-be Afrikana izao fa Rakoto, na Rabe no hahasolo tena marina ny vahoaka malagasy? Tsy afa-bela amin’ny sehatra iraisam-pirenena mihitsy isika na hihodin-kavia na hihodin-kavanana.....

Kanefa aoka tsy adika vilana izany ho fibaikon’ireo Fivondronam-be isan-karazany. Ny lalampanorenantsika tamin’ity repoblika fahatelo ity ao amin’ny andininy faha-6 dia milaza fa tsy misy antokon’olona afaka hampiasa sy hisalotra ny hevitry ny vahoaka na amin’ny ampahany ihany aza. Ny fifidianana no hamaritana izay fahefana omen’ny vahoaka izay. Niala sy nivoaka “ny lalàna velona” ny firenena nanomboka ny 17 Martsa 2009, ary io mitsingevaheva io hatramin’izao. Na ny ady lehibe roa teto amin’izao tontolo izao aza, tsy maintsy nifarana tamin’ny alalan’ny fifanarahana. Resy anefa ny Aléma tamin’izany rehefa nanaovana ady farimbona. Resy fa mbola nanaovana fifanarahana ihany. Ny antsika eto dia bodongerona no manjaka. Tsy misy na ravintaratasy iray aza milaza fa ny fifandrohitana politika nitranga teto dia manome rariny an-dRanona, na i Ranona. Ny olona nahazo ny an-tsasa-manila tamin’ny fifidianana no nahilik’ilay nahazo ny ampaham-bato be indrindra tamin’ny kaominina iray monja. Dia mino ianao fa hilamina amin’izany ny tany sy ny fanjakana? Raha mijery sy mandinika tsara ny rehetra dia mbola mampiseho ny heriny hatrany ireo kamboty nilaozandrainy ireo hatramin’izao. Dia aza gaga raha hihomehezan’ny olona fotsiny rehefa any amin’ny sehatra iraisam-pirenena any ka hihambo fa mahasolo tena ny vahoaka malagasy. Tery omby ririnina izy ity ka tsy maintsy hisy ny fitsinjovana manokana. Nahoana no mangina sy tsy te-hivolana intsony ny mpanelanelana vahiny? Satria mihamazava ankehitriny fa mbola ho lany fotoana sy vola indray ny rehetra. Na ho ela na ho haingana dia hiverina hanao fifanarahana politika ihany ny mpifanandrina rehetra. Amin’izay fotoana izay dia mety ho hafa mihitsy ny toe-draharaha sy ny tanjaky ny tsirairay. Mahaiza manetsa, hono, Ravaly fa hafa ny anio sy ny omaly. Aza mitaintaina homa-menaka fa ho lanoka ihany amin’ny farany. Ony RAMBELO