Madagasikara anivon-driaka: Lakan-drafitra very fivoy

Efa maro ny malagasy tsy nanan-tsafidy fa tsy maintsy mpiondrana ao an-dakana no tsy mahazaka intsony izany sangodim-panina aterak’izany voy lakana mifanohitra izany, saingy tsy re feo fa takon’ireo avo vava sy tompon’ny « hery ». Raha ny resaka heno etsy sy eroa dia mirona mankany amin’ny tokony hisian’ny olona sahy mandray andraikitra ho fifanavotana sy hanavotana an’i Madagasikara, fa efa ampy izay volana maro nihodinkodinana izay, ary efa nihoaran’ny fivoatran’ny zava-misy ara-politika ankehitriny ny miandry izay higadonany toa ilay « rafotsibe very laona ». Ny azo tsindriana fotsiny, na dia voalaza aza fa manana izay mampiavaka sy mahahafakely azy ny Nosintsika, dia tsy misy mahasamy hafa azy loatra tamin’izay efa niseho tany amin’ny firenen-kafa ny zava-misy eto Madagasikara amin’ny raharaha nilana fifampidinihana sy fifandaminana politika nenti-nametraka fitondrana demokratika neken’ny mponina tao aminy sady nankatoavin’izao tontolo izao.

… tsy ho vitantsika ?

Ka ireo mpanao politika samy manana ny fironany sy ny firehany noho ny fitsitokotokoany, na noho izy mitamba-dratsy toy ny boka (sanatria !) mbola variana amin’ny tombon-tsoany manokana avy ve no avela hampanjaka ny fombaratsiny, ka haha-faraidiny sy hampitain- kidin-trano antsika toy izao ? Toa zary lasa fihomehezan’ny olona isika, fa ny tafrikana nitsiriritra ny fananantsika olomanga fahiny no lasa mpitsetra sy hianteherana hitondra vahaolana ho an’ny firenentsika, na dia tsy levon’ny vavonin’ny mpanao politika sasany mbola rotsirotsian’ny hambom-pony fahiny aza izany. Mb o l a h i a n t e h i t r a amin’ireo efa very fivoy ireo ve isika ka hihodinkodina eto foana ? Ary hatraiza no fara-fiaretana izany ? Aiza ireo kintana mpialoha johary hanarin-dia ny lakan-drafitsika ? Fa tsy fahendren-drazana ny mandraiki-dresy, satria ny hery tsy mahaleo ny fanahy!