Manalavitra fampirafesana: Ireo paikady mahomby

Tsiambaratelo: Samy manana ny tsiambaratelony manokana ihany koa ny mpifankatia. Tsy tokony hozarazaraina na horesahana amin’olon-kafa ireo tsiambaratelo ireo fa hotazonina ho azy roa ihany. Voasokajy anatin’ireo olon-kafa ireo avokoa hatramin’ny namana, ny havana akaiky. Ny ratsy tsy kely lalana. Mety hisy hanararaotra hamadika izany ho fanakorontanana indray. Mifampiresaka: Zava-dehibe anatin’ny fiarahan’olon-droa ny mifampiresaka. Ataovy izay hanokanana fotoana ifampiresahana isan’andro. Tsy mahasolo velively ny resaka ifanatrehana, ifampibanjinan’ny maso velively ny resaka an-tariby izay efa zary mahazatra ny maro. Vao mainka aza mety hanimba ny fitiavana io, raha tsy hay ny mifehy azy.

Manalavitra: Paikady farany dia ataovy mihitsy izay hanalavirana ny trangan-javatra mety hitarika ho amin’ny fakam-panahy. Olombelona ihany mantsy ianao, mitafy nofo sy ra, mety ho tratry ny fakam-panahy. Iray ihany ny fomba tsotra tsy haharoboka anao amin’izany, dia ny fitsoahana azy. Azo raisina ohatra amin’izany ny fandavana fanasana ataon’ny namana iray hiara-hisakafo, raha hita fa hiafara amin’ny zavatra hafa ny resaka ifanaovana ao. Tsy mifidy olona asiana ny fampirafesana. Miteraka korontana sy fifandirana ary mety hiafara amin’ny faharavan’ny fitiavana mihitsy anefa izy io. Koa mba tsy hahatongavana amin’izany dia aleo ihany aloha misoroka toy izay mitsabo.