Fasan’ny karana: Mila vatan-kitay 80 eo ny iray

Mandany adiny roa Apetraka eo ambony kitay ny razana rehefa hodorana. Ao ny fonosina, ao ny miakanjo tsotra fotsiny, araka ny itiavan’ny fianakaviana azy. Totofana kitay tanteraka, tsy misy avela hipoitra ny faty hodorana. Raha ny filazan’i Bonaventure dia ampifandisoana tsikelikely avy any ambany ka hatrany ambony, mahavita manarona ilay faty ny vatan-kazo. Ny iray metatra no arafitra amin’ny sakany ary ny roa metatra no atao amin’ny andavany. Hosorana menaka “ghee” ny ki tay handorana ny faty, laroina irony “sesame” fanaingoana mofomamy irony ihany koa. Mahalany vatan-kazo 80 isa eo ho eo ny faty iray dorana. Adiny roa ka hatramin’ny adiny roa sy sasany kosa no mahalevona ny faty iray, arakaraka ny halehiben’ilay olona maty. Vetivety ny olona mahiahia. Raha ny fanazavan’i Bonaventure ihany dia ny tongotra sy ny tanana no may aloha indrindra, rehefa dorana ny faty. Manaraka avy eo ny loha ary ny vatana be no may farany. Mila manampy kitay indraindray mandritra ny fandorana ny vata-be. Ny taolana sisa no tavela rehefa tena may tanteraka ilay razana. Iny taona iny indray no kosehina amin’ny tavoahangy ary omena ny fianakaviana ny vovony hotahirizina. Mikasika ny fofom-paty indray dia nilaza i Bonaventure fa mamono ny fofona ny afo. Raha vantany vao mirehitra ny afo dia tsy misy fofona re intsony, fa ny feon’ny afo mitsetsatsetsa sisa no heno, rehefa tena mirehitra tsara ny afo. Raha somary midonaka tsy mahazo rehitra kosa anefa ny afo dia toy ireny fofon-kitoza atono irony ny fofona mivoaka re. Harimbola M.