Ny laharam-pahamehana

Nifandimby nandalo teto amintsika ny iraka manokan’ny SADC sy ireo parlemantera avy amin’ny vondrona eropeanina sy ny vondron’ny afrika sy karaiba ary pasifika (ACP). Samy nanambara izy ireo fa vonona hanampy antsika amin’ny fivoahana amin’izao krizy izao. Nifandimby nihaona tamin’ireo mpitondra fanjakana, mpanao politika, movansa, fiaraha-monim-pirenena ary ireo gadra politika izy ireo nandritra ny diany avy. Tamin’izany no nahatsapan’izy ireo fa samy naneho fahavononana hiala amin’ny krizy izy rehetra ireo. Ho an’ireo parlemantera eropeanina sy ACP aza moa dia nanizingizina fa tsy maintsy avoaka aloha ireo gadra politika raha te hiorina amin’ny fikatsaham-bahaolana isika. Nanaiky am-bava izany ny filohan’ny fahefana avon’ny tetezamita. Laharam-pahamehana tokoa ve izany famoahana gadra politika izany? Ho an’ireo vahiny mpanelanelana sy ireo vonon-kanampy antsika aloha dia tena laharampahamehana izy io. Ilaina mantsy ny famoahana azy ireo izay karazana fifamelan-keloka ihany, mialoha ny fifanatrehana sy fifanarahana amin’izay ho tohin’ny tetezamita. Lohalaharana ihany koa izany ho an’ireo gadra politika izay manantena ny hahazo fahafahana sy hihaona indray amin’ireo fianakaviana sy namana ary hiriaria ety ivelan’ny fonja toy ny olon-drehetra. Anisan’ny fitakian’ireo mpanao politika sy mpiara-mitolona avy ao anatin’ny ankolafy Madagasikara ihany koa izany famoahana gadra politika izany, izay napetrak’izy ireo ho laharam-pahamehana.......

Raha jerena amin’ny fo tsy miangatra anefa dia toa tsy laharam-pahamehana noho ny fiaraha-mikaroka ny marimaritra iraisana hivoahana amin’izao krizy izao mba hizorana ho any amin’ny repoblika fahefatra izany. Rehefa mifanaraka mantsy ireo mpifanandrina politika dia hivoaka ho azy ireo gadra politika ary tsy hisy intsony izany fanagadrana olona na andian’olona tsy mitovy firehana politika izany. Azo tombatombanana amin’izany avy hatrany fa raha mivoaka ireo gadra politika, kanefa tsy milamina ny politika ety ivelan’ny fonja, dia rahampitso ihany dia mety hiverina eny indray izy ireo na hisy olona hafa indray hisolo ny toerany. Ny Ntaolo fahiny rahateo no efa nahita sy nahatsapa fa : « kodiaran-tsarety ny fianana an-tany ». Ny fametrahana ny rafitra tetezamita hiarahan’ny ankolafy samihafa izany no tokony ho laharam-pahamehana ho antsika Malagasy. Hivoaka ho azy ny gadra politika ary tsy hisy intsony ireo hogadraina sy ny fanagadrana. Tsy midika ho fanaovana tsinontsinona ireo gadra politika akory izany, satria inoana marimarina fa hisafidy ny fifanarahana mialoha ny famoahana azy ihany koa ny ankamaroan’izy ireo raha mbola manjaka ao am‑pony ny fitiavan-tanindrazana sy ny fitiavana ny mpiray tanindrazana.