26 JONA 2010: Kabarin'ny Filoha Ravalomanana

Hitanay, hitan’izao tontolo izao ny hetsika nataonareo koa dia misaotra betsaka ary miantso anareo lehiben’ny commandement aho mba hiray hina tsara ny tafika Malagasy mba ahatanteraka ilay teny hoe: ianareo no “Tandroka Aron’ny Vozona” ary kitro ifaharan’ny firenena koa amin’izao fahasahiranana manjo ny firenentsika izao handray ny andraikitra sahaza anareo anie ianareo rehetra ary tsy homba ny atsy na ny aroa fa tena hampiseho tokoa fa tena “Tandroka Aron’ny Vozona”. Isika Malagasy rehetra dia samy mahita sy mahatsapa ny manjo ny firenentsika, izao tontolo izao dia mahafantatra tsara ny manjo sy mahazo ny vahoaka Malagasy. Herintaona sy tapany izay lasa tany tsisy fanjakana satria tsy ankasitrahan’izao tontolo izao ny fanjakana tsy ara-dalàna mijoro. Tany tsy fehezin-dalàna intsony ny firenentsika samy manao izay saim-pantany . Tsy atokisan’ny vahoaka intsony , eny fa na dia ny fitsarana aza , lasa fitaovam-pamoretana hanenjehana sy hanagadrana tsy amin’ny antony, voahitsakitsaka tanteraka ary voahosihosy ny zo maha-olombelona . Noporofoin’ny firenen-drehetra izay nivory tany Genève izany tamin’ny faha 10 volana jona lasa teo ary nohamarinina sy nohamafisin’ireo parlementaire eropeana. Nampiharina tamin’ireo mpitondra tsy ara-dalàna any Madagasikara ny sazy mba ahatonga azy ireo hiverina amin’ny fifampidinihina . Misy fiantraikany amin’ny fiainan’ny vahoaka Malagasy tsirairay nefa izany koa miantso anareo aho, ny tombontsoa ambonin’ny firenena, ilay fitiavan-tanindrazana marina no tokony no hifantoka ao an-tsain’ny tsirairay avy ary ny hanangana firenena tena vanona no tanjontsika mianakavy koa tonga ny fotoana amin’izao fankalazantsika ny faha 50 taonan’ny fahaleovantena izao; mba tsy ho fahaleovantena sarintsariny fa tena fahaleovantena tanteraka, fahaleovantena tsy tsabatsabahan’ny hafa fa fahaleovantena hahamasi-mandidy ny Malagasy. Diso hevitra tanteraka ny fanagadràna tsy amin’ny antony ireo mpanao gazety izay manao ny asany ka milaza ny zavamisy. Tena mamoafady, tsy fanao ny fanenjehana sy famonoana ireo mpitondra fivavahana raha mijoro sy mitsangana ho vavolombelona izy ireo ka milaza ny zavamisy ary mananatra ny vahoaka Malagasy. Mahatratra 48 eo ho eo ny isan’ireo manamboninahitra miaramila, zandary, polisy mbola eny am-ponja ary eo amin’ny 163 eo ho eo ny isan’ireo mbola migadra . Midika izany fa mbola ao dia ao ny disadisa , tsy fitoviam-pijery ary mahatonga ny fifankahalàna . Tsy afaka hilaza izany isika fa mihavana ny Malagasy amin’ity andron’ny 26 jona ity, andro iray ankalazantsika ny faha 50 taonan’ny fahaleovantenantsika. Henoy ny feon’ny fieritreretana fa “Masina ny Tanindrazana”ary lehibe dia lehibe ny firaisankina sy ny fifankatiavana. Aleo very tsikalakalam-bola toy izy very tsikalakalam-pihavanana . Tonga ary ny fotoana hahatonga antsika samy handinin-tena ary hampivondrona na indray ilay firaisankina. Ny hafa aty ivelany aza toy ny vondrona sadc, firaisambe afrikanina, eropeana ary amerikana, ny asiatika mivondrona manampy antsika maika ve fa isika samy Malagasy? Hitan’izao tontolo izao koa ireo fanambarana nataon’ny société civile izay manana fahavononana tokoa amin’ny fitadiavana izay vahaolana, mankahery anareo izahay. Tsy ny fandaniana vola be hanafarana ny artista na ny mpanao zavakanto akory no hanafaka ny fahasahiranana sy ny fahoriana mianjady amin’ny vahoaka Malagasy. Mandalo ihany ireny fa ny zavadehibe amin’ny vahoaka Malagasy dia ny hivoahana amin’izao fahasahiranana sy ny fahoriana mianjady aminy izao noho ny fisarahana amin’ny fianakaviana. Zavadehibe amin’ny vahoaka Malagasy ny fahitany asa ary zavadehibe amin’ny vahoaka Malagasy ny fampianarana ny zanaka. Ankehitriny anefa,hoy aho hoe tsisy asa, tsisy vola miditra , tsy afaka hampianatra ny ankizy vokatry ny sazy izay mihatra amin’izao fitondrana tsy ara-dalàna izao, tompon’andraikitra amin’izany isika mianakavy. Tonga ny fotoana hampivondronantsika indray ilay hery ahatonga antsika hifanazava, hifampidinika ary hametrahantsika amin’ny maha izy azy ny firenentsika satria masina ny tanindrazana. Koa manantitrantitra ny antso atao amin’ny foloalindahy aho mba hifampidinika ary hifananatra fa izay no zava-dehibe hamerenana indray ny fitsipi-pifehezana sy ny fifampitondrana eo anivon’ny foloalindahy sy ny mpitandro ny filaminana. Koa enga anie mba samy hahatsiaro tena ary handinika ny zavamisy isika. Ny hanangana firenena tena vanona no tanjona ataontsika mianakavy ary mahatoky isika fa hiverina hanampy antsika indray ireo firenen-dehibe , mpamatsy vola ahatonga ny firenena malalantsika hiroso amin’ny fampandrosoana marina sy maharitra ka dia ho tanteraka soa aman-tsara anie izany. HOMBA ANTSIKA ANDRIAMANITRA