Basy tsy mipoaka Be fandrapaka !

Tonga nanao fitsidihana teto amintsika ny iraky ny fitondrana Frantsay, ary nihaona mivantana tamin’ny filohan’izao fanjakana tetezamita izao. Ireto olona tonga taty amintsika ireto dia olona manam-pahaizana mpikarakara ny zana-tany Frantsay hatramin’izay. Midika ve izany fa mbola raisin’ny frantsay ho toy ny zana-taniny ity Madagasikara ity?Tsy vaovao loatra ny zavatra nambaran’izy ireo fa dia ny famporisihina ireo ankolafy rehetra hanatanteraka ny fifidianana haingana sy ao anatin’ny fotoana fohy, ary hanjakan’ny fahatoniana, mba ho hankatoavin’izao tontolo izao. Fa tsy efa izany ve no nodradrain’ny rehetra hatramin’izao fa vaha-olana ho an’ity firenena ity e? Manana antoka sy adidy ary tsy azon’iza na iza lavina ,fa ny Frantsay dia ao ambadiky ny mety ho famahana ny olana ara-politika eto amintsika eto. Ny mpanao politika malagasy dia samy revo amin’ny fifanomezan-tsiny hatrany fa tsy mijery izay tena tetik’ireo firenena vahiny. Nahatsapa ny Frantsay fa voasongona ny fihazonany ny laharana voalohany amin’ny fiaraha-misa amin’i Madagasikara nandritra ny fitondrana teo aloha ,ka dia miezaka mafy izy ankehitriny haka izay toerana izay. Tsy afa-bela amin’ny maha-mpikambana azy ao anatin’ilay fivondronam-be Eropeana anefa izy ka tsy maintsy manaraka izay hevitra tinapak’io firaisam-be io? Matoa misy resaka toe-karena dia ny handrombaka izay mba fananantsika eto izany no masaka an-tsain’ireo vahiny ireo. Moa ary ve tsy hadalana sy azo hambara avy hatrany ho fahadisoana ny manaraka ny baikon’ny any ivelany? Izany no mahatonga ilay fifanavahana amin’ireo mpanao politika malagasy ka hahatsinjovana avy ety ivelany ety ,fa hery hafa mihitsy ankoatra ilay ambara matetika ho fitiavana ny tanindrazana, no mibaiko azy ireo. Frantsay aho frantsay! Mbola hifanena amin’ny mpaka kitay, satria mahery mandrapaka sahala amin’ny voay, latsaka ambany izay mamon-divay, avela hanao fa ho main’ny sakay. Adaladala ka tsy mety ho fay! Olon-dehibe efa mananika ny 50 taona ka mbola ho fehezina amin’ny nonon-dreny ihany. Amerikana aho amerikana! Mihevitra ny tenany ho zandarin’izao tontolo izao ka tsy mifidy kibay hivelesana ireo heveriny ho mpitrifana sy tsy laitra anarina. Avelao koa hanao fa mbola higika amin’ity fandraofana tsy hita fetra ataony…Malagasy aho Malagasy ! Tsy mahay maka lesona amin’ny tantara fa toy ny saribakoly. Aza maka fanapahan-kevitra iraisana ihany fa ho faty sy hiesona eto daholo vao ho tratra ny nenina tsy hay hotantaraina amin’ny taranaka fara mandimby. Ary rehefa tsy manana hatolotra dia mifandiniha fa lany ny paiso ao an-kady e!